Vessantaravagga

mil6.3.1:1.1 “Bhante nāgasena, sabbeva bodhisattā puttadāraṁ denti, udāhu vessantareneva raññā puttadāraṁ dinnan”ti?

mil6.3.1:1.2 “Sabbepi, mahārāja, bodhisattā puttadāraṁ denti, na vessantareneva raññā puttadāraṁ dinnan”ti.

mil6.3.1:1.3 “Api ca kho, bhante nāgasena, tesaṁ anumatena dentī”ti.

mil6.3.1:1.4 “Bhariyā, mahārāja, anumatā, dārakā pana bālatāya vilapiṁsu, yadi te atthato jāneyyuṁ, tepi anumodeyyuṁ, na te vilapeyyun”ti.