4. Paṭisandahanapuggalavediyanapañha

mil3.2.4:1.1 Rājā āha—

mil3.2.4:1.2 “bhante nāgasena, yo na paṭisandahati, vedeti so kiñci dukkhaṁ vedanan”ti?

mil3.2.4:1.3 Thero āha—

mil3.2.4:1.4 “kiñci vedeti, kiñci na vedetī”ti.

mil3.2.4:1.5 “Kiṁ vedeti, kiṁ na vedetī”ti?

mil3.2.4:1.6 “Kāyikaṁ, mahārāja, vedanaṁ vedeti, cetasikaṁ vedanaṁ na vedetī”ti.

mil3.2.4:1.7 “Kathaṁ, bhante, kāyikaṁ vedanaṁ vedeti, kathaṁ cetasikaṁ vedanaṁ na vedetī”ti?

mil3.2.4:1.8 “Yo hetu yo paccayo kāyikāya dukkhavedanāya uppattiyā, tassa hetussa tassa paccayassa anuparamā kāyikaṁ dukkhavedanaṁ vedeti, yo hetu yo paccayo cetasikāya dukkhavedanāya uppattiyā, tassa hetussa tassa paccayassa uparamā cetasikaṁ dukkhavedanaṁ na vedeti.

mil3.2.4:1.9 Bhāsitampetaṁ, mahārāja, bhagavatā—

mil3.2.4:1.10 ‘so ekaṁ vedanaṁ vedeti kāyikaṁ na cetasikan’”ti.