2. Pubbayogādi

mil2:53.1 Atha kho pāṭaliputtako seṭṭhi āyasmato nāgasenassa iriyāpathe pasīditvā āyasmantaṁ nāgasenaṁ paṇītena khādanīyena bhojanīyena sahatthā santappetvā sampavāretvā āyasmantaṁ nāgasenaṁ bhuttāviṁ onītapattapāṇiṁ aññataraṁ nīcaṁ āsanaṁ gahetvā ekamantaṁ nisīdi, ekamantaṁ nisinno kho pāṭaliputtako seṭṭhi āyasmantaṁ nāgasenaṁ etadavoca—

mil2:53.2 “kinnāmosi tvaṁ, tātā”ti.

mil2:53.3 “Ahaṁ, gahapati, nāgaseno nāmā”ti.

mil2:53.4 “Jānāsi kho tvaṁ, tāta, buddhavacanaṁ nāmā”ti?

mil2:53.5 “Jānāmi khohaṁ, gahapati, abhidhammapadānī”ti.

mil2:53.6 “Lābhā no, tāta, suladdhaṁ no, tāta, ahampi kho, tāta, ābhidhammiko, tvampi ābhidhammiko, bhaṇa, tāta, abhidhammapadānī”ti.

mil2:53.7 Atha kho āyasmā nāgaseno pāṭaliputtakassa seṭṭhissa abhidhammaṁ desesi, desenteyeva pāṭaliputtakassa seṭṭhissa virajaṁ vītamalaṁ dhammacakkhuṁ udapādi—

mil2:53.8 “yaṁ kiñci samudayadhammaṁ sabbaṁ taṁ nirodhadhamman”ti.