cnd9:23.1 <b>Pamuñca maṁ sakka kathaṅkathāhī</b>ti.
BAGIAN 23
cnd9:23.2 <b>Sakkā</b>ti sakko bhagavā sakyakulā pabbajitotipi sakko.
cnd9:23.3 Atha vā aḍḍho mahaddhano dhanavātipi sakko.
cnd9:23.4 Tassimāni dhanāni, seyyathidaṁ—
cnd9:23.5 saddhādhanaṁ sīladhanaṁ hiridhanaṁ ottappadhanaṁ sutadhanaṁ cāgadhanaṁ paññādhanaṁ satipaṭṭhānadhanaṁ sammappadhānadhanaṁ iddhipādadhanaṁ indriyadhanaṁ baladhanaṁ bojjhaṅgadhanaṁ maggadhanaṁ phaladhanaṁ nibbānadhanaṁ.
cnd9:23.6 Imehi anekavidhehi dhanaratanehi aḍḍho mahaddhano dhanavātipi sakko.
cnd9:23.7 Atha vā sakko pahu visavī alamatto sūro vīro vikkanto abhīrū acchambhī anutrāsī apalāyī pahīnabhayabheravo vigatalomahaṁsotipi sakko.
cnd9:23.8 Kathaṅkathā vuccati vicikicchā.
cnd9:23.9 Dukkhe kaṅkhā, dukkhasamudaye kaṅkhā, dukkhanirodhe kaṅkhā, dukkhanirodhagāminiyā paṭipadāya kaṅkhā, pubbante kaṅkhā, aparante kaṅkhā, pubbantāparante kaṅkhā, idappaccayatāpaṭiccasamuppannesu dhammesu kaṅkhā.
cnd9:23.10 Yā evarūpā kaṅkhā kaṅkhāyanā kaṅkhāyitattaṁ vimati vicikicchā dveḷhakaṁ dvedhāpatho saṁsayo anekaṁsaggāho āsappanā parisappanā apariyogāhanā chambhitattaṁ cittassa manovilekho.
cnd9:23.11 <b>Pamuñca maṁ sakka kathaṅkathāhī</b>ti muñca maṁ pamuñca maṁ mocehi maṁ pamocehi maṁ uddhara maṁ samuddhara maṁ vuṭṭhāpehi maṁ kathaṅkathāsallatoti—
cnd9:23.12 pamuñca maṁ sakka kathaṅkathāhi.
cnd9:23.13 Tenāha so brāhmaṇo—