cnd8:106.1 <b>Tiṇṇo ca pāraṁ akhilo akaṅkho</b>ti.
BAGIAN 106
cnd8:106.2 <b>Tiṇṇo</b>ti kāmoghaṁ tiṇṇo, bhavoghaṁ tiṇṇo, diṭṭhoghaṁ tiṇṇo, avijjoghaṁ tiṇṇo, saṁsārapathaṁ tiṇṇo uttiṇṇo nitthiṇṇo atikkanto samatikkanto vītivatto.
cnd8:106.3 So vutthavāso ciṇṇacaraṇo gataddho gatadiso gatakoṭiko pālitabrahmacariyo uttamadiṭṭhippatto bhāvitamaggo, pahīnakileso paṭividdhākuppo sacchikatanirodho.
cnd8:106.4 Dukkhaṁ tassa pariññātaṁ, samudayo pahīno, maggo bhāvito, nirodho sacchikato, abhiññeyyaṁ abhiññātaṁ, pariññeyyaṁ pariññātaṁ, pahātabbaṁ pahīnaṁ, bhāvetabbaṁ bhāvitaṁ, sacchikātabbaṁ sacchikataṁ.
cnd8:106.5 So ukkhittapaligho saṅkiṇṇaparikkho abbuḷhesiko niraggaḷo ariyo pannaddhajo pannabhāro visaññutto pañcaṅgavippahīno chaḷaṅgasamannāgato ekārakkho caturāpasseno panuṇṇapaccekasacco samavayasaṭṭhesano anāvilasaṅkappo passaddhakāyasaṅkhāro suvimuttacitto suvimuttapañño kevalī vusitavā uttamapuriso paramapuriso paramapattippatto.
cnd8:106.6 So neva ācināti na apacināti, apacinitvā ṭhito.
cnd8:106.7 Neva pajahati na upādiyati, pajahitvā ṭhito.
cnd8:106.8 Neva visineti na ussineti, visinetvā ṭhito.
cnd8:106.9 Neva vidhūpeti na sandhūpeti, vidhūpetvā ṭhito.
cnd8:106.10 Asekkhena sīlakkhandhena samannāgatattā ṭhito.
cnd8:106.11 Asekkhena samādhikkhandhena …pe…
cnd8:106.12 paññākkhandhena …
cnd8:106.13 vimuttikkhandhena …
cnd8:106.14 vimuttiñāṇadassanakkhandhena samannāgatattā ṭhito.
cnd8:106.15 Saccaṁ sampaṭipādayitvā ṭhito.
cnd8:106.16 Ejaṁ samatikkamitvā ṭhito.
cnd8:106.17 Kilesaggiṁ pariyādiyitvā ṭhito.
cnd8:106.18 Aparigamanatāya ṭhito.
cnd8:106.19 Kathaṁ samādāya ṭhito?
cnd8:106.20 Vimuttipaṭisevanatāya ṭhito.
cnd8:106.21 Mettāya pārisuddhiyā ṭhito.
cnd8:106.22 Karuṇāya …pe…
cnd8:106.23 muditāya …
cnd8:106.24 upekkhāya pārisuddhiyā ṭhito.
cnd8:106.25 Accantapārisuddhiyā ṭhito.
cnd8:106.26 Atammayatāya pārisuddhiyā ṭhito.
cnd8:106.27 Vimuttattā ṭhito.
cnd8:106.28 Santussitattā ṭhito.
cnd8:106.29 Khandhapariyante ṭhito.
cnd8:106.30 Dhātupariyante ṭhito.
cnd8:106.31 Āyatanapariyante ṭhito.
cnd8:106.32 Gatipariyante ṭhito.
cnd8:106.33 Upapattipariyante ṭhito.
cnd8:106.34 Paṭisandhipariyante ṭhito.
cnd8:106.35 Bhavapariyante ṭhito.
cnd8:106.36 Saṁsārapariyante ṭhito.
cnd8:106.37 Vaṭṭapariyante ṭhito.
cnd8:106.38 Antimabhave ṭhito.
cnd8:106.39 Antime samussaye ṭhito.
cnd8:106.40 Antimadehadharo arahā.