Pucchāniddesa

cnd19:42.1 Vuttañhetaṁ bhagavatā—

cnd19:42.2 “nāyaṁ, bhikkhave, kāyo tumhākaṁ, napi aññesaṁ.

cnd19:42.3 Purāṇamidaṁ, bhikkhave, kammaṁ abhisaṅkhataṁ abhisañcetayitaṁ vedaniyaṁ daṭṭhabbaṁ.

cnd19:42.4 Tatra kho, bhikkhave, sutavā ariyasāvako paṭiccasamuppādaṁyeva sādhukaṁ yoniso manasi karoti—

cnd19:42.5 ‘iti imasmiṁ sati idaṁ hoti, imassuppādā idaṁ uppajjati;

cnd19:42.6 imasmiṁ asati idaṁ na hoti, imassa nirodhā idaṁ nirujjhati, yadidaṁ—

cnd19:42.7 avijjāpaccayā saṅkhārā, saṅkhārapaccayā viññāṇaṁ, viññāṇapaccayā nāmarūpaṁ, nāmarūpapaccayā saḷāyatanaṁ, saḷāyatanapaccayā phasso, phassapaccayā vedanā, vedanāpaccayā taṇhā, taṇhāpaccayā upādānaṁ, upādānapaccayā bhavo, bhavapaccayā jāti, jātipaccayā jarāmaraṇaṁ sokaparidevadukkhadomanassupāyāsā sambhavanti—

cnd19:42.8 evametassa kevalassa dukkhakkhandhassa samudayo hoti’.